茶王、OL、品味、「和記餐廳」，老招牌老師傅新作風，一個承傳香港情的故事
講真，圓圓雖喜愛茶餐廳的奶茶、鴛鴦，但對於成間都係充滿男人味既茶記就有所保留，就算搵食都好快食完就走，地下有黏笠笠既就更加唔會入去，好簡單我只係想舒舒服服食番餐安樂茶飯之嘛！上星期去灣仔Mira Moon酒店探兩位鬼鬼朋友，佢地就話想食本土local野，落樓行向銅鑼灣方向，兩、三間鋪位，見有間新裝修茶記叫「和記餐廳」，裡面既凳，椅都好特別，吊燈好雅致，睇得出個老板係一個有品味既人，見間餐廳幾乾淨，正前方大牆係紙皮石階磚，有幅富有香港特式既畫作；鬼鬼朋友們即說Hey Why not here，佢地似乎好想係呢度食，於是我地就在近街的窗口位坐下。睇下餐牌，價錢竟然同我屋企附近茶記一樣，仲免費包埋即磨咖啡，加3蚊雞就有埋椰汁紅豆冰，灣仔有咁樣既價錢，正呀！好，一於叫茶記野睇下得唔得先！
叫左銀芽肉絲炒麵、印尼炒飯、XO醬豬頸肉炒公仔麵、瑞士雞翼配沙律、煙肉卷夾牛角包、碎蛋夾法包，西多士，飲品叫左椰汁紅豆冰、奶茶、滾水蛋，份量唔少，賣相企理，水準我會比9個讚，性價比相當高，原來全因有個嫌尖老板娘Cherry，叫佢老板娘好似又老得滯，因為佢屬於80後係做左20年既OL。
當然識食唔係必然，要有班高人做後盾，Cherry有班勁姨媽，係主理西灣河「和記餐廳」班前輩，高峰時期，「和記餐廳」曾經有12間分店，不過始終茶記係辛苦困身行業，好多時都後繼無人，但Cherry就希望傳承下去，於是在家族幫忙底下，向各位阿姨們學師，由零知識，零經驗，到如今由食材、器具採購，收銀、招呼客人、外賣落單，事事都要落手落腳，親力親為，創業真不易，幸好，Cherry有個好幫手，係「金茶皇」比賽嘉賓評判之一既陳貴生師傅，30多年水吧經驗，令我地呢種有要求既食客就有機會飲到正奶茶。聽老板娘講，在附近工作的酒店員工，落場時候都會來歎杯即磨咖啡，吃個套餐，有時早、午、黃昏都見到同一班人，可想而知食物有相當質素。
80後既Cherry令茶記的形象改變不少，Cherry話玩social media係其一，另外餐牌飯名又可以搞搞新意：「好似平日午市套餐既粟米肉粒飯，我就叫佢做Show Me Your Love，人人都估係乜野黎，於是好奇之下個日既《粟米肉粒飯》就第一時間賣晒！又好似下午茶時段，有個叫《寂寞的雞扒包》，因為，無敵是最寂寞，即係超級無敵好味道啦！」
牆身係紙皮石階磚，有幅富有香港特式既畫作，有香港情味。
銀芽肉絲炒麵、印尼炒飯、XO 醬豬頸肉炒公仔麵都係
$48，大大碟，足料又抵食。
印尼炒飯有西班牙臘腸、爽滑蝦仁、蟹柳，那天食唔晒，拎左返屋企比印尼工人姐姐食，差 D 打爛佢個無豬砵添！
XO 醬豬頸肉炒公仔麵肉質彈牙
奶茶飲落喉嚨，係舌頭之中有回甘既感覺，果然茶王水準，我呢個對奶茶有極高要求既人都好滿意呀！
無敵是最寂寞的《寂寞的雞扒包》
食得出係冇味精豉油的瑞士雞翼
脆口肉香既《和記特式牛角包》
邪惡勁厚西多士$25
叫套餐加3蚊雞就有埋椰汁紅豆冰
老板娘Cherry以貼地價錢，將姨媽創立既老字號注入新意，好似那《芝士麵餐》的芝士麵就係跟那正宗韓國品牌入貨，好多OL、女生們呀都愛order這個。
滾水蛋可以係呢度搵都到呀！
新思維做港式餐廳生意，跟支付寶、八達通、係FoodPanda合作，面書 update餐單。
早餐唔再只係得唔健康既選擇，有鮮奶麥皮，仲有用幾十斤蕃茄煲出黎既通心粉湯底。
上面書專頁可以睇到即日餐單
Facebook專頁：和記餐廳-灣仔店
營業時間：早七至晚七
地址：灣仔謝斐道392-402號維新大廈地下E舖
其中餐牌
留言
張貼留言